Zaintzaren negozioa eta lan baldintzak salatu ditugu.

Martxoaren 8aren etorrerarekin, mugimendu feministak arratsalderako deitutako mobilizazioen aurrekari, Hego Euskal Herriko hiriburuetan mobilizatu gara zaintza sistema publiko komunitarioa aldarrikatzeko. Bilbon, Gasteizen eta Donostian Foru Aldundien aurrean egin ditugu elkarretaratzeak, EAJ interpelatzeko; Iruñean, berriz, PSNren egoitzak egin dugu protesta.

Hain zuzen ere, Iruñeko mobilizazioan Idazkaritza Feministako idazkari Elixabete Etxeberriak adierazitakoaren arabera, zaintza sektoreetako langileen lan baldintzen defentsan eta zaintza negozio iturri bilakatu dutenen kontra irten gara kalera. Izan ere, zaintza sektoreetako langileek esklabotzatik gertu dauden lan baldintza prekarizatuak pairatzen dituzte, eta errealitate horrek erantzule argia du: pribatizatu eta zaintza negozio bihurtu duten horiek.

EAEren kasuan, arduradun hori azken 40 urteetan agintean egon den alderdia da; EAJ, alegia. Nafarroan, gobernuko alderdi neoliberalek eta ultrakontserbadoreek urteetan zehar ildo berari jarraitu diote: pribatizatu, merkantilizatu eta jendearen premiak erabili irabaziak lortzeko. Horrela, milaka emakume langileren bizitzak prekarizatu eta enpresa pribatuentzako esleipenen bidez diru publikoa poltsikoratu dute. Zaintza, aberastasun iturri izan da batzuentzat.

Egoerak konponbidea behar du berehala. Zaintzaren negozioarekin amaitu eta zaintzak demokratizatu behar ditugu, martxoaren 8aren bezperan Elixabete Etxeberriak, Garbiñe Aranburu idazkari nagusiak lagunduta, egindako agerraldian jakinarazi bezala.

Hain justu, ezinbestekoa da pribatizazioaren joerari buelta ematea, adinekoen egoitzak eta Etxez Etxeko Laguntza Zerbitzua (ELZ) publiko eginez, erakundeek, agintean dauden alderdietatik haratago, benetako boterea izan dezaten zerbitzu horien prestazioan. Gure proposamenen artean giltzarri ere bada zaintzako eta, beraz, zerbitzua emateko langileen ratioak eta lan-baldintzak hobetzea. Era berean, etxeko langileen egoera erregularizatu behar dela nabarmendu dugu, eta LABek etxeko langileentzako hitzarmen bat lortzeko lanean jarraituko duela berretsi dugu.