Asbetosia edukita, 93 urterekin aitortu diote gaixotasun profesionala

CAF lantegian amiantoaren eraginpean lan egin zuen, prebentzio neurririk gabe. Osakidetzaren aurkako salaketa ipintzea baloratzen ari da Asviamie elkartea

Gipuzkoako Gizarte Segurantzak Beasaingo CAF lantegiko fundizioan lan egin zuen 93 urteko Goierriko pentsiodun bati ezintasun iraunkor absolutua eman dio, lanean aritu zenean, legeak exijitzen dituen prebentzio-neurriak hartu gabe amiantoarekin, kadmioarekin eta beste toxiko batzuen eraginpean egotearen ondorioz, asbetosia garatu duelako. Asviamie amiantoaren kaltetuen elkarteak jakinarazi du, gaixotasunaren jatorri profesionala aitortzearen ondorioz, pertsona honen pentsioa berrikusi dutela, eta hileko pentsioa bikoiztuko diotela. Gainera, egindako aitortzari esker CAF enpresari kalte-ordainak eskatzeko eskubidea izango du, «enpresak ez baitzuen bete bere osasuna babesteko betebeharra, amiantoaren eta beste toxiko batzuen aurka», nabarmendu du Asviamiek.

Hau guztia, urteetako borroka luzearen ondoren lortu du Goierriko pertsona honek. Asviamiek kritikatu du, «medikuek arnas gaixotasuna diagnostikatu izan baliote, aspalditik izango luke lanbide gaixotasunaren prestazioa kobratzeko eskubidea».

Ildo horretan, Asviamiek gogorarazi eta salatu du ez dela lehen aldia «Osakidetzako eta Zumarragako Ospitaleko medikuek, bereziki, 1299/2006 Errege Dekretua ez betetzea».

Salaketa jartzea baloratu

Elkarteak gogorarazi duenez, dekretu horrek «osasun-arloko profesionalak behartzen ditu, gaixotasuna izan daitekeenaren susmoa jakinaraztera Osalani, gaixotasun horren jatorria duela hamarkada batzuk garatutako lan-jardueratik erator badaiteke».

Hala, Asviamiek dei egin die osasun-arloko profesionalei «susmoa jakinarazteko betebeharra bete dezaten» 1299/2006 Errege Dekretuan jasotako zerrendan jasotako gaixotasun bat diagnostikatzen dutenean, «prebentzio-iruzurrean eta kalteetan lagundu gabe, horrek lanbide-gaixotasunak ezkutatzea baitakar». «Legea betetzea eta gaixotasunak ezkutatzeari uztea» eskatu dio Asviamiek Osakidetzari eta Arartekoari.

Amiantoaren kaltetuen elkarteak iragarri du, «Osakidetzaren aurkako salaketak aurkeztera behartzen gaitu, dekretuaren ez-betetze horrek eragindako kalteengatik».

Jatorrizko albistea: https://goierri.hitza.eus/2023/01/06/asbetosia-edukita-93-urterekin-aitortu-diote-gaixotasun-profesionala-2/